ទីក្រុងកៀវ៖ កាលពីពាក់កណ្ដាលឆ្នាំ២០២៣ អ៊ុយក្រែនបើកយុទ្ធនាការវាយបកទៅលើមូលដ្ឋានរបស់កងទ័ពរុស្ស៊ីនៅលើទឹកដីអ៊ុយក្រែន។ ប៉ុន្តែសម្រាប់ពេលនេះ អ៊ុយក្រែនកំពុងជីកត្រង់សេ (trench), លេណដ្ឋាន និងសាងសង់ជញ្ជាំងបេតុងដើម្បីត្រៀមទប់ទល់នឹងលទ្ធភាពនៃការវាយលុករបស់ទាហានរុស្ស៊ីជាយថាហេតុណាមួយនៅនិទាឃរដូវ។ គេឃើញទាហានអ៊ុយក្រែនចាប់ផ្ដើមដាក់ស្រាសលួសបន្លានៅលើទីវាលចម្ងាយជាងមួយគីឡូម៉ែត្រ។ ពួកគេខំជីកជម្រកស្នាក់នៅក្នុងដីជាប្លុកនីមួយៗ។ ជើងទម្រងបាញ់កាំភ្លើងធំក៏ស្ថិតនៅមិនឆ្ងាយប៉ុន្មានទេពីទីនោះ។

ខ្សែការពារមូលដ្ឋានរបស់អ៊ុយក្រែនដែលកំពុងរៀបចំនេះស្ថិតនៅក្បែរទីក្រុងគូពីយ៉ង់ (Kupiansk) ប្រទេសអ៊ុយក្រែនភាគឦសាន។ ទីនេះចាប់ផ្ដើមដំណើរការសាងសង់តាំងពីថ្ងៃទី២៨ ខែធ្នូ ឆ្នាំទៅមិញ។ នេះជាផ្នែកមួយនៃយុទ្ធនាការថ្មីរបស់អ៊ុយក្រែនដែលបង្វែរមុខព្រួញពីការវាយលុកទៅលើរុស្ស៊ីមកជាការត្រៀមទទួលយកការវាយលុកពីរុស្ស៊ីវិញម្ដង។ អ៊ុយក្រែនត្រូវតែបង្ខំចិត្តប្រើប្រាស់អ្វីៗគ្រប់យ៉ាងដោយការសន្សំសំចៃ។ មិនថាប្រើប្រាស់ថវិកាជំនួយ ឬប្រើប្រាស់អាវុធយុទ្ធភ័ណ្ឌនោះទេ។

អ្នកវិភាគអំពីស្ថានការណ៍យោធាសម្លឹងឃើញថារុស្ស៊ីចាប់ផ្ដើមបង្កើនការវាយប្រហារឡើងវិញហើយ។ កាលពីថ្ងៃទី២៨ ខែវិច្ឆិកា លោកហ្សេលែនស្គី (Zelenskiy) ប្រកាសថាអ៊ុយក្រែនកំពុងពង្រឹងខ្សែការពារនៅតាមមូលដ្ឋានរបស់ខ្លួនបន្ទាប់ពីពួកគេបិទបញ្ចប់យុទ្ធនាការវាយបកដែលចាប់ផ្ដើមកាលពីខែមិថុនា ឆ្នាំ២០២៣ដោយមិនអាចសម្រេចបានលទ្ធផលជាដុំកំភួនទេ។

ប្រភព៖ Reuters