រាជធានីភ្នំពេញ ៖ ពិតជារន្ធត់ណាស់លោកអើយ កង់បីមួយគ្រឿងបានស្រុញរួញកំពិតចូលគ្នាចូលគេជាន់កំប៉ុង ក្រឡាប់ផ្ងារជើងច្រង៉ាង ខណៈបុរសអ្នកបើកកង់បីស្លាប់យ៉ាងរន្ធត់ ចំណែកស្ត្រីជាអ្នករួមដំណើររងរបួសធ្ងន់ ក្រោយត្រូវរថយន្តកូរ៉េឃ្លុប បើកយ៉ាងលឿន បុកចំពីក្រោយចំហៀងផ្នែកខាងឆ្វេងពេញទំហឹង រួចអ្នកបើកបររថយន្តចុះរត់គេចខ្លួនបាត់។

ហេតុការណ៍នេះបានកើតឡើងកាលពីវេលាម៉ោង ៥:៤០ នាទីព្រឹក ថ្ងៃទី២៥ ខែតុលា ឆ្នាំ២០២៤ នៅលើផ្លូវ​៦០ម៉ែត្រមុខអ៊ីអន៣ ភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ក្នុងហេតុការណ៍នេះ បណ្តាលឲ្យជនរងគ្រោះឈ្មោះ ជូ វុទ្ធី ភេទ​ប្រុស​ អាយុ​៤០ឆ្នាំ​ អាសយដ្ឋាន​ ភូមិតារេនជោ ឃុំអង្កាញ់ ស្រុកទ្រាំង ខេត្តតាកែវ ស្លាប់យ៉ាងរន្ធត់នៅទីតាំងកើតហេតុ មានស្រុកកំណើតនៅខេត្តកំពង់ចាម។ចំណែកអ្នករួមដំណើរ ជាមនុស្សស្រី មិនទាន់ស្គាល់ឈ្មោះ និងអាស័យដ្ឋាន រងរបួសធ្ងន់ ត្រូវបានបញ្ជូនទៅមន្ទីរពេទ្យរុស្ស៊ី។

តាមប្រភពព័ត៌មានពីសមត្ថកិច្ចដដែលបានឲ្យដឹងថា មុនពេលកើតហេតុ គេបានឃើញ រថយន្តកូរ៉េឃ្លុបមួយគ្រឿង ម៉ាកBongo3 ពណ៌ខៀវ ពាក់​ស្លាក​លេខ ភ្នំពេញ 2BF-9739 បើកបរ​ក្នុង ទិសដៅ​ពី​ត្បូង​ទៅ​ជើង ដោយមិនស្គាល់ឈ្មោះ ​និងអាស័យដ្ឋាន ព្រោះបានរត់គេចខ្លួនបាត់ រថយន្តបើកបរល្បឿនលឿនខ្វះការប្រុងប្រយ័ត្ន មកបុក កង់បីឥណ្ឌា ម៉ាក BABJA ពណ៌​លឿង ពាក់​ស្លាក​លេខ តាកែវ 1S-0304 បើកបរ​ដោយបុរសម្នាក់ ឌុបស្ត្រីម្នាក់នៅខាងក្រោយ ក្នុងទិសដៅ​ពី​ត្បូងទៅ​ជើង ចំពីក្រោយចំហៀងផ្នែកខាងឆ្វេងពេញទំហឹង បណ្តាលឲ្យកង់បីស្រុញរួញកំពិតចូលគ្នាចូលគេជាន់កំប៉ុង ក្រឡាប់ផ្ងារជើងច្រង៉ាង ស្លាប់បុរសអ្នកបើកកង់បីស្លាប់យ៉ាងរន្ធត់ ចំណែកស្ត្រីជាអ្នករួមដំណើររងរបួសធ្ងន់ត្រូវបានបញ្ជូនទៅកាន់មន្ទីរពេទ្យរុស្ស៊ី ដោយឡែកអ្នកបើកបររថយន្ត ក្រោយបង្កហេតុ ចុះរត់គេចខ្លួនបាត់ស្រមោល។

អ្វីដែលមហាជនជាអ្នកធ្វើដំណើរលោកបានឃើញ ហើយហួសចិត្តនោះ គឺករណីនេះកើតឡើងតាំងពីវេលាម៉ោង ៥:៤០ នាទីព្រឹក រហូតមកទល់នឹងម៉ោង៩ព្រឹក អស់ពេលច្រើនម៉ោងទៅហើយ មិនឃើញមានរថយន្តពេទ្យណាមួយ មកធ្វើការវេចខ្ចប់សាកសព លើកសពដាក់លើរថយន្ត អែបកៀននោះទេ ឬក៏ចង់ឲ្យ ចាំសាច់ញាតិមកតាំងពីខេត្តកំពង់ចាម មកវេចខ្ចប់លើសពអែបកៀន ដែលមើលទៅពិបាកភ្នែកមើល អាណិតអាសូរជាខ្លាំង ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌមានជ័យ សហការជាមួយនគរបាលចរាចរណ៍ក្រុង ចុះធ្វើការវាស់វែង យករថយន្តនិងកង់បីឥណ្ឌាខាងលើ យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលក្រោយតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល វិចិត្រ+មេសា