រាជធានីភ្នំពេញ ៖ ជនសង្ស័យម្នាក់ ធ្វើសកម្មភាព កាប់ប្លន់យកម៉ូតូពីបុរសម្នាក់ដែលកំពុងធ្វើដំណើរ ត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ សហការជាមួយកម្លាំងជំនាញអធិការខណ្ឌឫស្សីកែវ ធ្វើការបង្ក្រាបបាន ។
ហេតុការណ៍នេះបានកើតឡើងតាំងពីវេលាម៉ោង ៣និង ៣០នាទី ឈានចូលថ្ងៃទី២៨ ខែឧសភា ឆ្នាំ២០២៤ នៅចំណុចផ្លូវឈ្នះឈ្នះ ភូមិកប់ស្រូវលើធំ សង្កាត់គោករកា ខណ្ឌព្រែកព្នៅ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះក្នុងករណីប្លន់នេះ មានឈ្មោះ សុខ ចាម ភេទប្រុស អាយុ២៦ឆ្នាំ មុខរបរ លក់ត្រី ដោយករណីនេះ ជនបង្ករមានគ្នា០៤ នាក់ ជិះម៉ូតូ២គ្រឿង បានធ្វើសកម្មភាពកាប់ប្លន់យកម៉ូតូពីបុរសម្នាក់ ដែលកំពុងធ្វើដំណើរនៅចំនុចខាងលើ។ ជាក់ស្តែងខាងសមត្ថកិច្ចការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ សហការជាមួយកម្លាំងជំនាញអធិការខណ្ឌឫស្សីកែវនិងកម្លាំងជំនាញអធិការខណ្ឌព្រែកព្នៅ បានធ្វើការឃាត់ខ្លួន ជនបង្កបានម្នាក់ ឈ្មោះ ស្រ៊ុនសីហា ភេទប្រុស អាយុ ១៨ឆ្នាំ(ជាជនជាតិខ្មែរ) មុខរបរមិនពិតប្រាកដ ដកហូតបាន ទូរស័ព្ទដៃចំនួន ១គ្រឿង និងម៉ូតូម៉ាកDream c125 ពណ៌ខ្មៅ ពាក់ស្លាកលេខ ភ្នំពេញ 1KU-7594 (របស់ជនរងគ្រោះ)
បច្ចុប្បន្នការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបាន កសាងសំណុំរឿងបញ្ជូនទៅតុលាការផ្ដន្ទាទោសទៅតាមផ្លូវច្បាប់ ៕ មេសា
016 772 021
©2023 រក្សាសិទ្ធគ្រប់យ៉ាងដោយ VITHEY NEWS