ខេត្តកណ្តាល ៖ នេះហើយជីវិត ដើម្បីក្រពះ ឪពុកម្តាយធ្វើបាយទឹកទុកឲ្យកូននៅលេង២នាក់បងប្អូននៅផ្ទះ ចំណែកខ្លួនទាំងប្តីនិងប្រពន្ធក៏ដើរលក់ខោអាវជជុះ ម៉ោង១០យប់ទើបមកផ្ទះ បែរជាគេប្រាប់ថា កូនលង់ទឹកប្រឡាយស្លាប់ទៅវិញ ។

ហេតុការណ៍នេះបានកើតឡើងកាលពីវេលាម៉ោង ៦និង ២០នាទីយប់ ​ថ្ងៃ​ទី​២៥ ខែ​កញ្ញា ឆ្នាំ​២០២៤ ចំណុច​ប្រឡាយ​ជ្រលង​ឆ្តោ ភូមិ​ដើមជ្រៃ ឃុំ​រកាកោង​ទី​២ ស្រុកមុខកំពូល​ ខេត្ត​កណ្តាល​។

សមត្ថកិច្ចបានឲ្យដឹងថា ជនរងគ្រោះដែលស្លាប់មានឈ្មោះ​ ជូរ​ សៀងហាក់​ ភេទ​ប្រុស​ អាយុ​៧ឆ្នាំ​ មុខរបរ​សិស្ស​ មាន​ទីលំនៅ​សព្វថ្ងៃ​ភូមិ​ដើមជ្រៃ​ ឃុំ​រកាកោង​ទី​២ ស្រុកមុខកំពូល​ ខេត្ត​កណ្តាល​។

ក្នុងនោះតាមការបំភ្លឺរបស់ឈ្មោះ​រឹម​ រី​ ភេទ​ប្រុស​អាយុ​៥៦ឆ្នាំ​ និងឈ្មោះ​កែម​ ចិន្ដា​ ភេទ​ស្រី​អាយុ​២៩ឆ្នាំ​ ជាឪពុកម្ដាយបង្កើតរបស់ជនរងគ្រោះបានប្រាប់ឲ្យដឹងថា ជារៀង​រាលរាល់ថ្ងៃពួកគាត់បានទុក​ជនរងគ្រោះ​ឲ្យនៅជាមួយកូនប្រុស​បងម្នាក់ទៀតឈ្មោះ​ ជូរ​ សៀង​ហេង អាយុ​៩ឆ្នាំ​ នៅ​ផ្ទះ​តែ២​នាក់​បង​ប្អូន​ ដោយដោយគាត់បានដាំបាយធ្វើម្ហូបទុកឱ្យរួចរាល់ ហើយពួកគាត់ទាំងពីរនាក់ប្ដីប្រពន្ធ ក៏ចេញដើរ​លក់​ខោអាវ​ជជុះ​រហូត​ ដល់​ម៉ោង​១០យប់ទើប​មក​ដល់​ផ្ទះ​វិញ​។ លុះនៅ​ថ្ងៃទី​២៥.០៩.២០២៤​វេលាម៉ោង០៩:០០នាទី ក្រោយពីពួកគាត់ដាំបាយធ្វើម្ហូបទុកឱ្យជនរងគ្រោះនិងកូនប្រុសម្នាក់ទៀតរួចរាល់ ពួកគាត់ក៏ចេញទៅដើរលក់ខោអាវជជុះដូចរាល់ដង។

ដល់វេលា​ម៉ោង​ប្រហែល​១៦:៣០​នាទី​ អ្នកជិតខាងក៏បានឃើញជនរងគ្រោះជាមួយបងប្រុសរបស់ខ្លួន និងក្មេងៗដូចគ្នាចំនួន០៣នាក់ទៀត ដើរទៅលេងនៅទំនប់ទឹកក្រោយភូមិ។ លុះ​ដល់​វេលាម៉ោង​១៨:២០នាទី​ ក្មេងៗដែលទៅជាមួយជនរងគ្រោះនោះបានរត់ឡើងមកភូមិវិញ ហើយក្មេងស្រីម្នាក់ឈ្មោះ ផល្លា​ លីយ៉ា​ បានប្រាប់សមត្ថកិច្ចប៉ុស្តិ៍ថា ឈ្មោះ​ ជូរ​ សៀងហាក់​ បានលង់ទឹកប្រឡាយ ឮដូច្នេះកម្លាំងប៉ុស្តិ៍ និងលោកមេឃុំមេភូមិ រួមនឹងប្រជាពលរដ្ឋក៏បាននាំក្មេងស្រីឈ្មោះផល្លា រីយ៉ា ទៅកន្លែងកើតហេតុ ហើយក៏នាំគ្នាចុះរាវរកជនរងគ្រោះ ក៏បានរកឃើញជនរងគ្រោះលង់ទឹកស្លាប់បាត់ ហើយក៏បានប្រាប់ទៅឪពុកម្ដាយជនរងគ្រោះឲ្យមកកន្លែងកើតហេតុ រួចក៏នាំគ្នាយកសពជនរងគ្រោះមកផ្ទះ។

បន្ទាប់មកកម្លាំងជំនាញបានសហការជាមួយកម្លាំងប៉ុស្តិ៍ គ្រូពេទ្យបង្អែក និងអាជ្ញាធរធ្វើការពិនិត្យសពជនដងគ្រោះឃើញ​ថា​៖​សពជនរងគ្រោះមានទឹកចេញ​តាម​ច្រមុះ​និង​មាត់នៅ​លើ​ផ្នែក​ក្បាល​ ដង​ខ្លួន​ អវៈយវៈ ពុំមាន​ស្លាក​ស្នាម​អ្វី​ផ្សេងគួរឲ្យ​កត់សម្គាល់​ឡើង​ ដូច្នេះតាមការសន្និដ្ឋាន សពជនរងគ្រោះ​ពិត​ជា​ស្លាប់​ដោយសារ​លង់ទឹក​ប្រាកដ​មែន​។

ពេលនេះសពជនរងគ្រោះ​ត្រូវ​បាន​ប្រគល់​ឲ្យ​ទៅ​ម្ដាយ​បង្កើត​ឈ្មោះ​កែម​ ចិន្ដា​ ដើម្បី​យក​ទៅ​ធ្វើ​បុណ្យ​តាម​ប្រពៃណី ៕ អែល មេសា