ខេត្តកំពង់ស្ពឺ ៖ អគ្គិភ័យ​បានឆាបឆេះផ្ទះមួយខ្នង យ៉ាងសន្ធោសន្ធៅខ្ទេចអស់គ្មានសល់ ក្រោមអណ្តាតភ្លើងរាប់ម៉ឺនអង្សារ ខណៈភ្លាមៗលោកឧត្ដមសេនីយ៍ទោ​ ឃឹម​ សុកខៃ​ ស្នងការ​នគរ​បា​ល​ខេត្ត​កំពង់ស្ពឺ​ ចុះពិនិត្យ​ទីតាំង​ដោយផ្ទាល់ នា​ព្រឹក​ថៃ្ងទី​ ១០​ កញ្ញា​ ២០​២៤​ ស្ថិតនៅចំណុ​ច​ភូ​មិរបងច្រុះ ឃុំសំរោងទង ស្រុកសំរោងទង ខេ​ត្តកំពង់ស្ពឺ ។ នេះបើយោងតាមផេកផ្លូវការរបស់ ស្នងការដ្ឋាននគរបាលខេត្តកំពង់ស្ពឺ ។

សមត្ថកិច្ចបានឲ្យដឹងថា ម្ចាស់ផ្ទះឈ្មោះ ប៉ាង ប៉ូ ភេទប្រុ​ស អាយុ ៣៥ឆ្នាំ ប្រពន្ធឈ្មោះ ហ៊ុន សុភា អាយុ ៣៦​ឆ្នាំ រស់នៅភូមិ-ឃុំ​ កើតហេតុខាងលើ ។

យោងតាមការឲ្យដឹងពីលោកវរសេនីយ៍ឯក​ ឃុត​ សុផល​ អធិការ​នគរបាល​ស្រុក​សំ​រោង​ទង​ បញ្ជាក់​ថាអគ្គិភ័យចាប់ផ្ដើមដំបូងចេញពីផ្នែកចង្រ្កាន​បាយខាងក្រោយផ្ទះរួចបានរាលដាល​មកដល់ខាងមុខ​ បណ្ដាលអោយខូចខាតសម្ភារៈមួយចំនួន​៖

-ឆេះផ្ទះ ចំនួន ០១ខ្នង ទំហំ ៦×៨ម៉ែត្រ ធ្វើពីឈើលើថ្មក្រោម ដំបូលប្រក់ក្បឿង ជញ្ជាំងក្តារ

-ឆេះគ្រែ ចំនួន ០៤

-ឆេះពូក ចំនួន ០៤

-ឆេះទូរ​ដាក់ខោអាវ ចំនួន ០២

-ឆេះកង្ហារ ចំនួន ០២ គ្រឿង

-ឆេះសាឡុងឈើ ចំនួន ០១ឈុត

-ឆេះមាស ចំនួន ០១ តម្លឹង

-ឆេះលុយខ្មែរ ៨០០,០០០៛ (ប្រាំបីសែនរៀល)

-ឆេះប្លង់ដី ចំនួន ០៧ សន្លឹក

-ឆេះសំបុត្រកំណើត ចំនួន ០៣សន្លឹក

-ឆេះសៀវភៅស្នាក់នៅ ចំនួន ០១ ក្បាល

-សម្ភារៈប្រើប្រាស់មួយចំនួនទៀត។

ក្នុងពេលអគ្គិភ័យកំពុងតែឆាបឆេះរថយន្ដពន្លត់អគ្គីភ័​យ​​ របស់​អធិការ​ដ្ឋាន​នគរបាល​ស្រុក​ រថយន្ត​ពន្លត់អគ្គិ​ភ័យ​របស់​ស្នងការ​ដ្ឋាន​នគរបាល​ខេត្ត​កំពង់ស្ពឺ​ រថយន្តពន្លត់អគ្គិភ័យ​ វិទ្យា​ស្ថា​នបច្ចេកទេសតេជោ ហ៊ុន សែ​ន ចំនួន០១គ្រឿង ដោយបានប្រើប្រា​ស់ទឹកចំនួន​០៣​រថយន្ដ ប៉ុន្ដែស្ថានភាពមិនអំណោយផលគឺបណ្ដា​លឲ្យអគ្គិភ័យ​ឆាបឆេះ​ផ្ទះពលរដ្ឋ​ស្ទើរទាំងស្រុង​ ប៉ុន្តែ​ករ​ណី​នេះមិនបណ្ដាលឲ្យរងរបួសគ្រោះថ្នាក់ដល់អាយុជីវិតមនុស្សសត្វទេ​ តាមការសន្និដ្ឋាន​បឋម​មូលហេតុបណ្ដា​លមក​ពី​ ឆ្លងចរន្តអគ្គីសនី៕ នុច