រាជធានីភ្នំពេញ​៖ ក្មេងស្រីម្នាក់ នៅវ័យក្មេងត្រូវកំព្រាបាត់បង់ឪពុក ខណៈម្តាយដែលជាប្រពន្ធ ឈរបីកូនតូចម្នាក់ទៀតជាប់ដៃ សម្លឹងមើលសាកសពប្តី ដែលបានលោតទម្លាក់ខ្លួនពីលើអាគារជាន់ទី៤ ស្លាប់យ៉ាងអាណោចអាធ័ម ក្រោយប្រាប់ប្រពន្ធកូនថា គាត់ឃើញខ្មោច ឃើញយមរាជមកយកគាត់ គាត់ខ្លាចណាស់ ។

ហេតុការណ៍នេះបានកើតឡើងកាលពីវេលាម៉ោង ២យប់ ឈានចូលថ្ងៃទី១២និង​៣០នាទី​រំលង​អធ្រាត្រ ឈាន​ចូល​ថ្ងៃ​ទី​៥ ខែ​កក្កដា ឆ្នាំ​២០២៤ ​សង្កាត់​ផ្សារ​ថ្មី​ទី​២​ ខណ្ឌ​ដូនពេញ រាជធានី​ភ្នំពេញ​ ។

តាមប្រភពព័ត៌មានពីស្ត្រីជាប្រពន្ធបានឲ្យដឹងថា សពប្តីរបស់គាត់ មានឈ្មោះ​ តេង សេង​ឌី​ ភេទ​ប្រុស​ អាយុ​៤២ឆ្នាំ​ មុខរបរ​មិន​ពិត​ប្រាកដ​ តែងតែផឹកស្រាជាប្រចាំ និងតែងតែរវើរវាយថា ឃើញខ្មោច ខ្លាចខ្មោច បែបនេះរហូត លុះដល់ថ្ងៃកើតហេតុ ស្រាប់តែប្តីរបស់គាត់ ស្រែកថាឃើញខ្មោច ឃើញយមរាជ គាត់ខ្លាចណាស់ រួចក៏លោតពីលើផ្ទះជាន់ទី៤ ចំទុយោទឹក បាក់ហូរទឹកពេញកន្លែងនោះ និងបានស្លាប់យ៉ាងអាណោចអាធ័ម ផ្អើលដល់ប្រជាពលរដ្ឋ នាំ​គ្នា​លើក​សព​ពី​កន្លែង​កើត​ហេតុ​ យក​មក​ដាក់​អែប​ខាង​ចិញ្ចើម​ផ្លូវ ។

ក្មេងស្រីតូចជាកូន បាននិយាយទាំងអួលដើមក និងទឹកភ្នែកថា ឪពុកជាបង្គោលគ្រួសារ ធ្វើនិយាយជាមួយខ្លួនថា នឹងនៅជាមួយកូនរហូតដល់ចាស់ រស់ថ្ងៃរស់នៅតាមសំយ៉ាបផ្ទះគេ លុយក៏គ្មានសម្រាប់រៀនសូត្រ ថវិកាក៏គ្មាន ណាក្រៅពីខ្លួនហើយនោះ ក៏មានប្អូនតូចម្នាក់ទៀត តែពេលនេះបែរជាឪពុកមកស្លាប់បែបនេះ តើបានអ្វីទីពឹងបន្ត នាងតូចបានសុំឲ្យមហាជន ជួយជាថវិកាសម្រាប់ធ្វើបុណ្យសពឪពុកនាងផង ដើម្បីឲ្យឪពុកទៅបានសុខ ចំណែករឿងផ្សេងទៀត នាងមិនសុំនោះទេ បើទោះបីជានាងតូច គ្មានទីជម្រក គ្មានលុយសម្រាប់គ្រួសារ និងគ្មានសូម្បីលុយសម្រាប់រៀនសូត្របន្តក៏ដោយ តែសង្ឃឹមថា នឹងមានសប្បុរសជនអាណិត ជួយដល់នាងតូចផង ។

ក្រោយកើត​ហេតុ​ ដោយ​ជីវភាព​ខ្វះខាត លោកឧត្តមសេនីយ៍ទោ សូយ ណារិទ្ធ មេបញ្ជាការរងកងពលតូចលេខ៧០ ក៏ចូលរួម​ថវិកា​មួយ​ចំនួន ​និង​បានចាត់អោយ​កងកម្លាំង​​ ដឹកយក​សព​ទៅ​ធ្វើ​បុណ្យតាម​ប្រពៃណី​​នៅ​វត្ត​ទឹក​ថ្លា​៕